مقطع من زجلية : حْلِيمَة / بقلم الزجال حكيم البورشدي

حْلِيمَة
جَدِّي البَارَحْ سِينَا
عْلَى اوْرَاقْ الشْجَرْ
عْلَى اجْرِيدْ النْخَلْ
عْلَى دْمُوعْ حَارَّة تَقْهَرْ
عْلَى ايَّامْ كَانَتْ زِينَة
سِينَا عْلَى كْلَامْ الحَقْ
يَخْرُجْ مَنْ ضَلْعْ السْكَاتْ
بْلَا مَنَّة يَتْڭََالْ فِينَا
عْلَى حْدُودْ
مَرْسُومَة عَالوْرَاقْ
عْلَى كَذْبَة
وْ بَزَّافْ دْ الحْمَاقْ
عْلَى مُوجَة كْبِيرَة
هَايْجَة فْ جْزِيرَة
عَڭَْرَاتْ الصْخَرْ
خَبْلَاتْ الصْبَرْ
خَلَّات حْلِيمَة
نَذْبَتْ الڭََاشُوشْ
أُو النَّذْبَة عَرَّاتْ الصْدَرْ ،،

حْلِيمَة
مْرَا مَنْ ذَاكْ العَاهَدْ
مَا حَلْفَتْ مَا عْطَاتْ عَاهَدْ
كُونْ عَرْفَتْ
الخَاوَة تَرْجَعْ تْرَابْ
وَ الدَّمْ
مَنْ دَمُّو يَتْعَابْ
وَ يَتْبَخَّرْ بَزْ مَنُّو فِالسْمَا
شِي يَاخُدْ مَنُّو
حَفْنَة غْمَامْ
أُو شِي يَلْبَسْ مَنُّو كْفَنْ
فْلُونْ السْحَابْ
كُونْ حْلِيمَة
كَتْبَتْ كْتَابْ عَالمَكْتَابْ
أُو صَامَتْ الكَتْبَة
بْلَا سْبَابْ
كُونْ حْلِيمَة
دَفْنَتْ حَلْمْهَا فْغُرْڭَْ التْرَابْ
أُو مَا تْخَلِّي المَا يَدِّيهْ
حَارَتْ حْلِيمَة كِي دِيرْ لِيهْ
بِآشْ مَنْ تْرَابْ تْغَطِّيهْ
تَمْ أَ حْلِيمَة فْذَاكْ الوَادْ
ڭَْبَلْ مَا يَتَّمْ وَلَّا يَتْيَتْمُو الوْلَادْ
تَمْ أَ حْلِيمَة
بْكِي عَالكْفَنْ أُو لَبْسِيهْ
يَمْكَنْ تْشَمِّي رِيحْةْ الدَّمْ
يَمْكَنْ تَحْتْ الرْدَمْ
تَلْڭََايْ اشْبَرْ
تَمْ آَ حْلِيمَة أُو دَفْنِيهْ ،،
مقطع من زجلية : حْلِيمَة
الزجال حكيم البورشدي