*** مُولاتْ الْخَالْ ***بقلمي جواد بنمريد اليعگوبي التازي

*** مُولاتْ الْخَالْ ***

حْكَايْتِي مْعَ مُولاَتْ الْخَالْ
حْكَايَة فِيهَا كْثِيرْ مَا يَتْقَالْ
يَحْكِيوْهَا لَعْجَايَزْ لَلْأَطْفَالْ
يْنَسْجُو مَنْهَا خْيُوطْ فْلَخْيَالْ
نَحْكِيهَا لُيكُمْ نْسَا ؤُ رْجَالْ
سَمْعُو فَهْمُو ؤُ رَدُّو الْبَالْ
فـَبْلَادِي رَاكَبْ عَوْدِي خَيَّالْ
لْجَامُو ؤُ سَرْجُو ذْهَبْ مَثْقَالْ
عْلَى ظـَهْرُو عَايَشْ سَايَحْ جَوَّالْ
سْهُولْ ؤُ وَدْيَانْ مْرُوجْ ؤُ جْبَالْ
وْلِيعْتِي فْقَلْبِي مَشْغُولْ الْبَالْ
وْحِيدْ ؤُ الْوَحْدَة فِيهَا مَوَّالْ
نْغَنِّيهْ صْدَاهْ تْرَدُّو لَجْبَالْ
غَايْتِي الْعَشْقْ ؤُ الْحُبْ عْلْيهْ عَوَّالْ
نْقَاصِي ؤُ نْعَانِي نْحَارَبْ لَهْوَالْ
عْتَرْ عَوْدِي لْجَامُو فْيَدِّي تْقَالْ
نْزَلْتْ مَنْ بِينْ رَجْلِيهْ نْفَكْ لَخْبَالْ
ؤُ لَخْبَالْ كْسَا مَنْ حَايَكْ لْثَامْ ؤُ سَرْوَالْ
قَدْفَاتْهُومْ لَرْيَاحْ الْعَاصْفَة مَنْ شِي طْوَالْ
الطِّيبْ رِيحْهُومْ ؤُ لْمَسْكْ يْرَدْ الْبَالْ
ضَمِّيتْهُومْ لْصَدْرِي دْفَاهُومْ زَادْنِي هْبَالْ
لَفْكَارْ الْحَايْطَة بِيَا رَجْعُو عْلِيَا غْوَالْ
حَاوَلْتْ نَهْرَبْ مَنْهُومْ وَالُو مُحَالْ
مُولاَتْ لَكْسَا بْطِيبْهُومْ يَسْلَبْ لَعْقَالْ
فَهْدَابْ عَوْدِي عَلَّقْتْهُومْ عْزَمْتْ التَّوْكَالْ
عْلَى مُولاَنَا نَصْدَفْ لِّي شَغْلَتْ الْبَالْ
عَوْدِي وْهُوَ سَارِي جْفَلْ ؤُ كَثَّرْ لَصْهَالْ
مَالَكْ يَاعَوْدِي عْلَى هَادْ لَفْعَالْ
فْخَاطْرِي تْكَلَّمْتْ ؤُ قُلْتْ السُّؤَالْ
مَا بْغَا يْزِيدْ حْرَنْ قْضَالِي لَقْوَالْ
ؤُ كْلاَمِي فْجُوفِي حَالُو احْوَالْ
سَمْعِي فَاقْ عْلَى لَحْنْ الْخَلْخَالْ
ؤُ خْفَافْ عَقْلِي مَا بْقَا فَلْخَيَالْ
مـَنْ لْسَانْ لْطِيفْ جَانِي مَرْسَالْ
يْنَادِي يَا ابَنْ الْعَمْ يَا ابَنْ الْخَالْ
لَكْسَا فَهْدَابْ عَوْدَكْ يَّامْهُومْ قْلاَلْ
مُولاَتْهُومْ فْمَرْمَى عِينَكْ احْكَمْ لَفْعَالْ
نْطَقْ لْسَانِي مَبْحَاحْ مَسْلُوبْ لَفْعَالْ
عْلِيكْ نْقَلَّبْ مَحْلاَكْ بْخاَلْ
بْهَاكْ وَتـاهْ ؤُ زَادُو زُينْ زْرِيعْ الْخَلْخَالْ
كْسَاكْ فَهْدَابْ عَوْدِي فْيَدِّكْ حْلاَلْ
الْقَلْبْ هْوَاكْ ؤُ الرُّوحْ ؤُ الْخَاطَرْ مَالْ
لِيكْ طَالَبْ رَاغَبْ نْشَافِي لَهْبَالْ
بَابْ لَغْرَامْ ضْوَا مَنْ ظْلاَمْ الْحَالْ
السَّرْ المَكْنُونْ رَفْرَفْ بَجْنَاحُو مَزَالْ
فْرُوحْ ذَاتَكْ نَاوِي يْحَطْ التَّرْحَالْ
سَلْتَكْ لَلَّهْ ضَمِّينِي بَجْوَابْ السُّؤَالْ
كَيْتِي بَدْوَاخْلِي تَنْزَفْ شَلاَّلْ
عَلْتِي فَلْعَطْفَة نَقَلَّبْ مَنْ هَادِي شْحَالٍ
دْوَاهَا فـَنْسَامَكْ يَا مُولاَتْ الْخَالْ
دْوَاتْ ؤُ قَالَتْ جْوَابْهـَا ظَنِّيتُو مُوحَالْ
مَمْلُوكَة ؤُ الْمَالَـكْ شْدِيدْ ؤُ قَتَّالْ
جْوَادَكْ رْكَابَكْ لَلْهَرْبَة كُونْ عَوَّالْ
سْلاَحَكْ هْبَالَكْ تْهَزْمُو مُوحَالْ
سْهَامْ قَلْبَكْ عَصْفَاتْ بْلَدْخَالْ
طَيْشُو نْخَافْ عْلِيكْ مَنُّو فَلْحَالْ
هْمَسْ رِيحْ لْيَالِي قْطَعْ كْلاَمْهَا ؤُ قَالْ
بَنْبِيحْ كْلاَبْ صْيَادَة مَنْهَا شْحَالْ
حَاطَو بِينَا مْعَ زْعِيمْ ؤُ عَشْرَةْ رِجَالْ
رْعَادْ ؤُ بَرْقْ تْكَلَّمْ ؤُ سْمَا دَمْعْهَا سَالْ
ؤُ ظْلاَمْ قْسَحْ لْيَالِي نْهَارُو طْوَالْ
رْيَاحْهَـا عَزْفَاتْ بَدْفُوفْ لَهْوَالْ
الْبُومْ ؤُ لَغْرَابْ نْشَازْهُومْ صْدَحْ مَوَّالْ
نَادَاوْ بَنْدِيبْ الْحَظْ ؤُ تَعْسْ الْمـَآلْ
بَارُودْ عْمَارْتُو تْكَلْمَاتْ فَسْلاَحْ رْجَالْ
دَمْهَا ؤُ دَمِّي وَدْيَانْ مَاهَا سَالْ
رْوَاتْ مَنـُّو شَبْعَاتْ سْهُولْ ؤُ تْلاَلْ
رْبِيعْ خْضُورْتُو مَنُّو زَرْعُو طَالْ
ؤُ يَدْ الْعَاشَقْ تْقَطْعَاتْ مَنْ جْدَرْ لَوْصَالْ
مَا لَمْسَاتْ يَدْ الْمَعْشُوقَة مُولاَتْ الْخَالْ
 ؤُ بْقَاتْ حْكَايَة تَتْنَاقَلْهَا الْأَجْيَالْ

بقلمي
جواد بنمريد اليعگوبي التازي