هاداك وهادا / بقلم الشاعر / ادريس جبيلو

هاداك وهادا

دگيت المسمار
وعلقت راسي
ؤوتقته بالخيط
كنت انا الخمار
ولعب كاسي
بصورتي فالحيط
شعلت المجمار
بالبخور نواسي
نقطع السيط
ففدادن الاعمار
مابغيت نسمع عيط

هاداك فالي واهواله
كتبة مكتوبة فكتاب
وهادا حالي ومواله
محجب محجوبة فحجاب
هاداك اهبالي واقواله
مغرب غرابة فغراب
وهادا دلالي وهلاله
مترب تربة بتراب
هاداك حملي وسلاله
محرب حرب بمحراب
وهادا جهلي وخصاله
مگرب گربة بگراب
كيف تكسبني الفرحة
ونسعد بهناها
وانا جدوري مگرحة
مالقيت دواها
كيف تواتيني الشطحة
وما هولني غناها
الصورة باهتة ومايحة
مارقات لسماها
بطانتي زفرة رايحة
ماوفاني سداها
حروفي ساقطة وطايحة
ومداد القلم مارواها

بقلم ادريس جبيلو
المغرب