تْشاش / بقلم الشاعر / يزيد علوي اسماعيلي

★★ تْشاش ★★

فَهّمُونِي يا هْلي و عْلاش
موجز و خدمة ما لْقَاش ؟؟
دق أبواب و ما خَلّاش
حُلم ضاع و أمل ما بْقاش
تقاضى جهدو و ما يَدْوِيش!!!

عايش مسكين عيشة لَكْبَاش
نهار لكبير يَاكُل مَحْراش
نهار ما يَلْقاش يْگول بْلاش
كأنو ما كان و لا عاش
و هذا هُو حال الدَّرْوِيش!!!
ؤ واحد خْلَق فْراسُو شَاش
يْبَات قَصَّار كِيف الخُفّاش
ف الصباح يعانق لَفْرَاش
و ما يْفِيق حتى لْطّْنَاش
ما مْسَوَّقْش ؤ ما يَدْرِيش!!!
للجامعة -جَّامِي- ما مْشَاش
ؤ وظفوه وَخَّا ما يَقْرَاش
ما يْتْعاتَب ؤ ما يَتْلامْش
ما عرفت خْدَمْتُو وَقْتَاش
دِيما يْغِيب ؤ ما يَمْشِيش!!!
هذا واقع ؤ فيه تْشَاش
واليوم دَرْت عليه فْلاَش
بَاشْ نفضح ذاك الغشاش
اللي يعاملنا كيف أَوْبَاش
و مهما قلت ما يَكْفِيش !!!
واحد حضَّر ؤ ما كْلاَش
مْعَلّمُو باين ما يَسْوَاش
مهما خَدْمو ما يَرْضَاش
مَجْحاح سَقْرام ؤ مَقْشاش
ؤ حَتّا درهم ما يَعْطِيش !!!
حَاسَبْنا كُثْلَة أَوْبَاش
أَجْسَام نَبْتَت ف عْشَاش
يْعاملنا مْعَامْلة لَمْشَاش
وَيْلَا دْوِيتِي يْنَعْتَك حْشَّاش
ما يْهَمو غِي وَحْدو يْعِيش!!!
عْلى التفاهم ما يَقْوَاش
السَّبَّان من فمُّو رَشَّاش
و لو تكون عْسَل ما تَحْلاش
ؤ قِيمتَك جَنْبُو ما تَعْلاش
و لَوْ تْكُون طاوُوس بْالرِّيش!!!

  بقلم الشاعر / يزيد علوي اسماعيلي