أبو العباس / بقلم الشاعر / محمد الشرقاوى

أبو العباس
____________
وكأن الدنيا بتحلم
الطير والفضا والناس
غادر دنيانا وسافر
الشهم أبو العباس
ولقيت الدمع بحور
والقلب صبح مكسور
كان وسط الشارع نور
بالحب وبالاحساس
وكأن الدنيا بتحلم
الطير والفضا والناس
_______________
وكأن العمر ساعات
بتمر فى غمضة عين
تصنع أحزان وأهات
وهموم تزرع فدادين
وتسيبنا ف نار وعذاب
ع الأهل و ع الأحباب
نبكى وعارفينها سراب
ويعذب روحنا حنين
وكأن العمر ساعات
بتمر فى غمضة عين
________________
وكأن الحزن كتاب
جامع كل الأسماء
أطفال وشيوخ وشباب
وفى قلب الصفحة عداء
للبسمة وللأفراح
ولكل شروق ونجاح
راسم فى حياتنا سلاح
بيهل صباح ومساء
وكأن الحزن كتاب
جامع كل الأسماء
_________________
فى الجنة بإذن الله
ومعاك صحبة وأخيار
رب الأكوان فى علاه
رحمن وكمان غفار
هتعيش ف قلوبنا أكيد
الحب ده مش بالإيد
ويا رب دعانا يفيد
وتلاقى أطيب دار
فى الجنة بإذن الله
ومعاك صحبة وأخيار
__________________
شعر /محمد الشرقاوى