((هما كلمتين)) / سعيد عباس الضو

((هما كلمتين))
عايز أقولك كلمتين
بس يبقوا بينك وبينى
اصلى خايف تجرحينى
وجرح الكرامه أصعب 
من جرح عينى
لو كان لى عندك خاطر
أو لسه بتعزينى
جاوبى بصراحة
واياكى تغشينى
هل ومازلتى ؟
بتخافى عليا م المخاطر
قوليها بصراحة
ومتخفيش
 ما انتى عارفانى جرىء
وشاطر
 وقلبى جامد متغلبش
ويبقى جوايا جروح كتير
وبرضو باقدر اتحمل
وأعيش
والحقيقه بتبقى مره
وما تتنسيش
بس أهون ألف مره
من جروح تبنى بغش
ووش واحد
أحسن من اللى كل يوم
يطلع بألف وش
نفسى أسمع كلمتين
يكونوا جواب شافى
إنتى عايزانى ولا لأ
ولسه عليا بتخافى؟
طب ليه المعامله الزق !
نفسى أشوف ف عنيكى
وأنا لو امشى حافى
بس قلبك يفوق يرق
دا والله
لما جبت سيرتك
لقيت كل القوافي
جتنى تجرى وتغازلنى
والحروف قاعده تزق
والنجوم لما غارت
قامت اتدارت جوه شق
والشمس رخره جابت
القمره قدمها زق
شايف كلامى أثر عليكى
اصله باين ف لمعان عنيكى
حاول تدارى رعشة إيديكى
وبلاش تاخدى قرار انفعالى
ولا تقولى كلام ارتجالى
ولا يصعب عليكى حالى
أنا أقوى م اللى
فى بالك وبالى
الحب مش
شىء خيالى
ولا شعر واغانى
ولا سهرة ف انصاص
الليالى
الحب شىء راقى
وسامى
الحب يعنى ناس
عايزه تعيش
ساعات معاها كتير
ساعات مفيش
ساعات تضور ما تلقيش
كل دا ميهمنيش
المهم يكون بينهم تسماح
مش قلب مجروح
وقلب جارح
الحب معناه إيد بتبدر
وايد بتحضن
فتصبح بساتين
وقمح طارح
يملا خيره في كل
المطارح
الحب مش رواية هابطه
وجمهور يملى
المسارح
 سعيد عباس الضو