حسن رمضان

مَفْرَمة الحيـــاة !
فى المفرمــــــة
هتلقى قِسْمَة مقسِّمَة
هتلقى ناس متألِّمَة !
ماعمرها شافت نعيم
حرمان قَوِى ومستسلمة
إن شافوا حد بيبتسم يستغربوا
وإن شافوا مُهْجَة بتتعِصِر بيطبطبوا
والهم من فوق الجبين
خطوطه باينة معَلِّمَة
فى المفرمة تلقى الموظف مكتئب
من قبل يوم خمسة تلاقيه
طالب هَرَب !
ديَّانْتُه ناس مُتَكَلِّمَة ورقبته منهم سِمْسمَة
مراته دى علامة تأثُّر
وولاده استفهام كبير وكيفما
اللحمة ليه بقت علينا مُحَرَّمَة ؟!
هو احنا ليه رمضاننا طال ؟
إمْسَاك بصورة مُنَظَّمَة
الناس بتاكل م الزبالة
وماشية أخر برطمة
وان يوم يقابلهم مُذيع
بيعلموهم يشكروا
ويقولوا للناس اصبروا وبياكلوا لُقمة مكرَّمَة !
ويكُحُّوا فى تراب بعدها
ويعيشوا ذكراها سنين
فى بلادنا ياما مظلومين !
وناس حظوظها من السما
 حسن رمضان ـ كبير باحثين بالوعظ بالأزهر الشريف