دَعْوِة المَظْلُوم
ـــــــــــــــــــــــــــ
كُل ظَالِم وِلُه نِهَايَه
مَهْمَا طَال زَمَن الحِكَايَه
مَهْمَا شَاب أو عُودُه عَجِّز
هَيِيجِي المُوت وِيِنْهِيهَا الحِكَايَه
كُل نَبْتَه مِ البِدَايَه
يَا إمَّا خِير أو كُوم خَطَايَا
أوعَى تِظْلِم فِيهَا رَكِّز
دَه انْتَ مُفْتَاح الرِّوَايَه
يَامَا نَاس قَبْلَك وِظَلَمُوا
رَاحُوا فِين تَحْت التُّرَاب
دَاسُوا عَ المِحْتَاج وِجَارُوا
لَمَّا خَلُّوا أخْرِتْهُم خَرَاب
نَهَبُوا فِيهَا حَق غِيرْهُم
وَلاَ مَرَّه رَجَّعْهُم عِتَاب
مَات مَعَ الفَسَاد ضَمِيرْهُم
لَمَّا أمَنُوا مِن العِقَاب
قَالُوا اِحْنَا وحُوش أُسُود
قَالُوا اِحْنَا أسْيَاد العَبِيد
عَيِّشُوا غِيرْهُم غَلاَبَه
وِعَيِّشُوهُم عَ الحَدِيد
وِدَعْوِة المَظْلُوم صَارُوخ
عَدَّى فُوق جَاب السَّحَاب
وِدَمْعِة المَظْلُوم يَا وِيلَك
بُرْكَان جَهَنَّم لِلعَذَاب
كُل ظَالِم وِلُه نِهَايَه
مَهْمَا طَال زَمَن الحِكَايَه
مَهْمَا شَاب أو عُودُه عَجِّز
هَيِيجِي المُوت وِيِنْهِيهَا الحِكَايَه
ـــــــــــــــــــــــــــــــــــــــــــــ
كلمات الشاعر أحمد شاهين
----- مصر --- أسيوط -----
ليست هناك تعليقات:
إرسال تعليق