بِحَقِّ الشَّهَادَة / كلمات الشاعر أحمد شاهين

بِحَقِّ الشَّهَادَة
ــــــــــــــــــــــــــــــــــــ
يَا 100 خُسَـــــارَه يَا بَلَد
لَمَّا الجَبَان بِيوَلَّع فِي البَلَد
لَمَّا الخَسِيس بِينْحَر فِي المَسَاجِد
بِدُون دَلِيل وَلاَ سَنَد
لِيه بِتقْتِل يَا حَقِير ؟!
لَو انْتَ عَ الحَق تِبَان
مُش مِسْتَخَبِّي فِي اللِّحَى
تِضْرَب وِتِجْرِي يَا جَبَان
شَايِل فِي إيدَك سِلاَح وِنَار
وِوَاخِد الدِّين سِتَار شِعَار
يَا نِبْقَى مُجْرِمِين زَيُّكُم
يَا نْكُون فِي عنِيكُم الكُفَّار
مَرَّه بِتِضْرَب فِي العَرِيش
مَرَّه بِتِضْرَب فِي الوَاحَات
وِازَّاي هَتِقْدَر بِينَّا تِعِيش
وِطَالْبِين رَقَبْتَك فِي اللي مَات
إزَّاي بِتِحْرَق كَنِيسَه وِجَامِع
عَايِز تِفَضِّي دُور العِبَادَه
اللهُ أكْبَر شَايِف وِسَامِع
يِقَصِّر أجَلْكُم بِحَقِّ الشَّهَادَه
دَه انْتُوا وَالله مُش بَشَر
وَلاَ وِلْد آدَم وَلاَ وِلْد حَوَّا
وَلاَ لِيكُم قُلُوب مَكَانْهَا حَجَر
عَايشِين فِي غَابَه وِانْتُوا الفِتُوَّه
بِتِقْتِل مُسَالِم وَاقِف يصَلِّي
بِيدْعِي رَبُّه رَاكِع وِسَاجِد
وِانْتَ خَسِيس حَقِير نَازِلِّي
هَدَفَك مَا يبْقَى فِيه مَسَاجِد
كُنْتُوا فِين وَقْتِ الصَّلاَ
مَاسْكِين فِي ايدْكُم السِّلاَح
قَال المُؤَذِّن يَللا اقْتِلُوا
وَلاَّ قَال حَيَّ عَلَى الفَلاَح
هِيَّا دِي كَانِت صَلاَتكُم
وَقْت مَا كَان الأذَان
مَلْعُونِين مِ اللي خَلَقكُم
يَا صَفْحَه سُودَا فِي الزَّمَان
ـــــــــــــــــــــــــــــــــــــــــ
كلمات الشاعر أحمد شاهين
----- مصر - أسيوط -----